Overture sa Piyano nga Yabag

(alang kang Jude)

Sa higayong imong ipatong ang
Imong mga tudlo sa tikla
Kun mahimo ipalayo ang tamdanan
Sa imong piyesa
Gamitang metronomo ang pitik
Sa imong dughan
Ug bisan pa ug anayon ang akong
Mga kwerdas sa sulod
Ikaw na ang bahala mutukar
Sa akong mga bahin nga
Itom ug puti.

Katapusan sa Hulaw

alang kang bukog

Nitayhup ang igang nga huyuhoy. Taud-taud nag inday-inday ang halok sa uwan sa atop; nisalisi sa abling bintanang pahungawan sa kainit. Nangamras sa langit ang mga kuko sa liti. Nag-alburuto ang dugdog. Nahagbong pahayang ang unos nga gisalo sa piit nga kagus sa kagabhion. Ug sa dihang nagluha ang yuta sa kalipay, gilunupan ang ngiob nga tugkaran. Pagka buntag, sa may pultahan, adunay duha ka lipak sa kawayan --umog ug nagtinandayay-- nangaanud sa niaging baha.

Ang Kagawasan sa Pagkalimtanon

Karon, human sa milabayng kwarenta ka tuig,
Sa unang higayon malimtan ni Besing og linya iyang
toong kilay.
Nawani niya ang lapis sa eyebrow nga nasuksok
Ilawm sa mga basiyo sa haplas sa rayuma.
Kalit lang di niya matugkad nganung naglingkod siya
Atubangan sa samin sa may aparador.
Sa tinuod, maong nangunot ang kabang nga kilay ni Besing,
Dili niya mahinumduman daw kinsa iyang gipangandaman.
Ang iyang gitipigang hulagway sa tawng nisaad mubalik
Kwarenta ka tuig nang niagi nihanap sa iyang panumduman
Dihang nanambo si Besing sa abog nga samin.

Gladiola

Nganu man, Ma
nga dili nimo lingion ang gladiola

Adto man gyud ka sa
mga klabel, rosas, dalia

Day, makahinumdum
man gud ko ining buwaka

Ang gitungtong sa longon
niadtong namatay akong mama

Raspa Human sa Laglag

Unya, doc
apila nalang sad ug kuot
ang tanan nahabiling
kasubo nako sa pinakalawm
pinakangitngit nga bahin
sa akong tagoangkan.

Kuota pag lawm, doc
para masilhigan ang akong
kunsensya tutal wa pa man
nihupas ang akong
anestisya.

Hunas

Compostela, Cebu



Way madungog nga hagawhaw sa dagat
Inig hawk sa bawd sa tiilan sa baybayon
Sa layu, ang siga sa lampara sa mangingisda
Murag mga gagmayng tuldok
Nga lamyon sa kangitngit matag hunghong
Sa habagat ug mga damgong nangapalid
Pipila kalakang pa sad ang lakwon sa hunasan
Kung baktason nimo paingon sa lawd
Pero inig bangon sa adlaw sa sidlakan
Muabot ang lab-as nga bahanding nagkisikisi
Sakay sa mga barotong gihatod
Sa naghaguros nga taob
Nagdagan, nagdasig mugakos sa
Parat-tam is nga baybayon.

Pan Burikat

Si Padre Jose, ang kuraparoko
Sama ra sad ni Ricky, tigtumod ug isda sa merkado
Ug ni Dan, drayber sa panel
Silang tanan, kun gutumon
Ganahan mukaon ug pan --

Kanang puwa ang palaman murag
Simud gimudmud sa lipstick
Humokhumok, basabasa muhapin sa tabunon nga dila
Gahigahi ang kubal inig ingkit

Sa luag nga pustiso ni Padre
Hingo nga atubangang ngipon ni Ricky
Hiwi nga ngipon ni Dan murag ang ruta sa
Panel nga iyang drayban

Ang pinakalaming pan
Gibaligya sa ilang Nang Pidia
Ang tindahan nga ang tugkaran
Nagtalikod sa lote sa simbahan

Kada udtong tutok nga silay alimuotan
Mugawas sa padre sa kumbento
Biyaan ni Ricky ang tulda sa iyang asawa sa merkado
Idalikyat ni Dan ang iyang panel

Biyaang nagdagan ug init ang makina atubangan sa tindahan
Ug sa dihang silang tulo magdungan ug tudlo sa bus-ok nga pan
Ila nalang sad giapilan ug bugnawng pantulak para sa tibugol
Sa ilang tutunlan, pabugnaw sa kaigang sa ilang purol

Ang kagutom mabusog sa usa tutok ni Ana, ang serbidora

Unsaon Pagpili ug Pamanhunon sa Usa ka Labasera

Kanang kung akong tagaan ug
Bakasi, iyang inilarang
Kung dunulan ug
Alimango, iyang pabukalan
Kauban sa mga pasayan
O kung anduhaw, iyang tuwahon

Bolinao, tulingan, gisaw
Tamban, palotpot, aninikad
Dili ra ni mao iyang mapakyaw
Pakapinan nakog tam-is nga pahiyum

Ang Puwang Bokswagen Ni Tatay

Ang nagbuy-od nga tiyan ni Tatay
Sama sa puwang bokswagen
Nga tubilan og Kulafu matag Biyernes
Hangtod moawas

Inig suka
Maabirya sa daplin
Sa dan, kilid sa plasa

Usahay
Mag-illegal parking
Sa gawas sa Melie's
Sa beerhouse
Sa may unahan

Inig pauli
Mag-alburoto ang iyang
Tambutso

Modasmag
Sa pultahan ug sofa
Kay napundiran sa iyang
Headlights

Kada Sabado sa buntag
Ang puwang boksawagen
Magbuy-od sa lantay
Sa gawas, kilid sa balay

Wala nakagrahe
Gitiketan ni Nanay
Para palit og pamahaw
Bayad sa tulo ka kilong bugas
Sa duha ka latang sardinas

Inig kuot ni Nanay
Sa bulsa ni Tatay
Hubas pas gasolinador

Labada

Pagpabuwa

Gamiti ug powdered soap
Pangpahalang sa mata
Inig hilak, saw-a ang
Luha sa planggana
Ug ihumol ang mga sanina
Pero ayaw kalimti ang klorin



Pagtangtang sa buling


Mamatay


Kusukuso



Mamatay


Kusukuso


Mamatay

Kusukuso


Mamatay
Sa pagkusukuso


Mamatay
Magkusokuso




Pagpauga sa tisirt

Lubagon
Sama sa liog

Ihayhay
Sama sa pag-alsa
Ug taw sa kwilyo

Ibuwad sa adlaw
Sama sa buwad pinikas

Pagbiya sa Pier Tres

Ingon aning orasa
bitayon ang adlaw
ug lumsan sa dagat.

6:30 A.M.

Gisamaran sa fastcraft ang dagat
samtang hinayhinay nangahagbong
ang mga pinong dagom sa taligsik –
nanusok sa mga lantsa, barko
ug sa bukobuko kong way pandong.

Gitulod sa mga bawd palayo
ang imong pulong sa pagbalik.
Samtang ikaw, uban sa imong maleta,
gihatod sa akong panan-aw
ngadto sa panganod.

Ingon aning orasa, aning dapita
natilawan sad nako ang dagat
nga mitulo sa akong ngabil.

sa isig ka tumoy sa mga pulong

1. elipsis


tulo ka luha
nagsunod og

patak

niginhawa
og lawm

patak

ginhawa

patak


ningpatik ningkapyot
sa mga linya sa akong aping

ang sumpay ug katapusan
sa atong sugilanon nagbitay
sa pangpang sa kawanangan



2. koma

manguhit sa abaga
ang mga pulong
nga nakigtapad sa linya

mga pulong nga sa usa ka kidhat
makab-ot makuhit malugit
matuhog ang linya
padung sa langit
gamit ang gagmayng ikid
tumoy sa lapis



3. tuldok

pulong sa padulong nang mabiyuda

kining tanan
mahuman ra

karong taud-taod
hukman na sa langit
kung kanus-a moabot
ang katapusan sa

taas mong paghigda
taas nga linya sa dextrose
taas nga bill sa ospital

kining tanan darling
kung butangan og tuldok

zero zero
ang sunod

Pagdakop ug Kaka

Inig kagabii

kanang dayun ka punder

sa dinaginot nga suga sa

kilomkilum

manakop ko ug kaka.

Ang sulo ang

magtultol nako asa motunob

ang akong tiil sa butihon nga

nawng sa dan paingon sa

bukid

Hain sila manago

Aduna man sa'y mata ang

lapalapa sa akong ispartan ba

mulili sa ilawm sa mga bato,

kalibunan, ug dagkong kahoy

Diin gahuwat ang mga kaka

Kanus-a sila maabtan

sa akong sulo

Kanus-a sila masakpan

sa akong tiil

Matag naay murag

mangamang

sa akong

kuyamoy ug lapalapa

Mukitoy na akong

mga kamot

Mudakop sa kaka

Nga akong ligoon

sa kahayag sa sulo

Hakpon iyang mga kasway

Tayhupan ug init nga hangin

Gikan sa akong baba

Ug isulod sa kangitngit

Sa karton sa posporo